Traktor van de week (1)

Goed, me goan der ki mee beginnen. Den eerste klasse bak dak zoen willen voorstellen is de 153-Poborski. Genoemd naar de de ontwikkelaar Poborski Traktorski. Een Russisch bedrijf, opgericht door Pavel Poborski in 1912. Poborski kwam ut een arm gezin, mo wist zich toch op te werken. Hij wist een rieke boerendochter te verleiden en kost zo studeren aan de Moscow State University. Doar behoalde ie een Bachelor of Science degree in Traktor Entertainment en Construction. Omda z'n voader karaktergestoord was, was em dat ook. Op een avond et die dan die rieke boeredochter dood geslegen en eur geld getsjoept. Mo je was toch nog snugger en jet de poen geïnvesteerd in een bedrijf da' gespecialiseerd was in traktors, omdat ie nog altied karaktergestoord was et ie dan de toenmalige baas ook dood geslegen en dus nu noemt et bedrijf nog steeds Poborski Traktorski. J'et joarenlang gouden zaken gedoan, in de tiede van de kolchozen en de sovchozen.

Mo toen da Hitler machtiger en machtiger begost te worden, zag Stalin da die traktors ook als een niet te onderschatten woapen kosten gebrukt worden. Stalin sloot een deal met Poborski en de 153-Poborski was geboren. 153, omda die traktor 153 pk had. In die tiede was da niet te gurten! Der hingen ook messen an! Je ku je wel voorstellen dat d'Amerikanen er wel schrik van zullen g'ad 'en van zukke snelle en gevoarlikke traktor!

Boer Berten - toet de noaste ki!

Mien allerliefste kleinzeune Janneman

Kzoen gèren ook ki utleggen waarom dak nu juste met een blog begost zien. Ewel tis ollemolle begost me' mien kleinzeune. Alli ken eigentlik meerdere kleinzeunen wi, mo tis geeneen zo geniaal as Janneman. Em et zelve ook e blog. Jan et ol joaren een grote liefde vo boaten - moest'n ze kun'n proaten, em zoet der mee trouwen zei Mariette altied. We muggen toch ki lakken é? Mo goed, de Jean et dus bie mien ki internet kommen installeren. Te lik wel nog redelik lange gedeurd, wa dak roare voenden, want Jan is een snuggere kèrel. J'et ze humaniora gedoan an't Sint Pieters College te Blankenberge en nu zit ie aan den Universiteit van Gent. Em doet Burgelijk Ingenieur. Jet wel lik de eerste joaren wa moeilijk g'et. J'et tan ook nog ki vo piloot willen goan, mo das ook mislukt. Da joen volk mist toch soms karakter é, mo gouw je zit nog altieden aan de unief dus das goed. Mo dus Jan et mien internet geïnstalleerd - na 3 dagen. Z'n uitleg klopte ergenst wel wi. Em wou mien systeem eerst uploaden via FTP mo da gieng lik ni, en ton et ie Ubuntu geprobeerd mo da was nog erger. Toen et ie geweune gebeld no de mannen van Telenet.

Kweeten eigenlik nog altied ni goed waarom da z'em Janneman noemen, kvind ki lik de Jean beter klienken, allez da klinkt kloeker, nie woar? Mo goed, da's den invloed van z'n vrienden é. Em zit nu ook met een wuf, Elke en nog entwadde. Ken eur e poar keren gezien, kweetet ni, zis lik te kleine vor em. Mo atten gelukkig is, da's 't belangriekste natuurlik. En j'et de looks van ze voader, dus jet de meisjes der mor ut te plukken é. Jis pertang altied mien liefste kleinzeune gewist wi, ja kwam vroeger altied langs. Wiender an vroeger e zeilboat e. Mo wen em tan moeten verkopen, omdat et crisis was en de boerebond weigerde ons t'elpen. Kzeggen't wen wiender een nieuwen Daens nodig! Die Boerenbond kiekt alleine achter de grote boeren, wiender zien mo goed vo de drek ip te kuschen...

Mo Janneman et dus ook een blog, om de weeke stelt ie een nieuwe boat voor'n. En eergisteren was't ie nog ki langs gekommen en je was doar in geuren en kleuren over aan't babbelen en opeens zei tie: "Allez opa, da zoe toch ook etwa vo joen zien? Iedere week een nieuwe traktor!" Eerst vondik da lik mo roare, mo uteindelik et ie me overhaald. Jet me z'n eigen blog ki loaten lezen. En echt, taalkundig zit da prachtig in elkaar é! En de humor dat ie gebrukt, niemand kut der aan tippen. Em beschrief et telkens heel wetenschappelijk zodat et noois belachelijk wordt. En kzeggent inhoudelijk leest et als één van de betere romans, lik Daens. Vandoa dak ook begost zien.

Boer Berten - toet de noaste ki!

Wien is Boer Berten? Nen introductie...

Joat joat kiekedroad, ik zien dus Boer Berten - geboren en getogen in Zuienkerke. Miene officiële noame is Gustaaf Bertrem, mo m'n hele leven lange ziek al boere. M'n oeders woaren boere, mie grotoeders woaren boere, en ik moeste ook boere worden, vorstoa je't? Doavan da de menschen mien geweune Boer Berten (da lig lik makkelikker in de moend) noemen. Kort en krachtig! Mo de dag vanvondoage ziek ip pensioen, ken nog beesten wi, doa ni van, mo kzien al 72 joar. Je wordt oeder en de botten en vlugger zère, verstoa je't? Mo't beste voedsel bluft et voedsel da je zelve kwikt, is da ni azo? Bejoat, dus zaai 'k nog oaltiet m'n peloeze vol me roapen.

Kweetent dat et op't eerste zicht lik roare is dat een oede mensch ip't internet zit, en kmoen eerlik toegeven kzoen der eigentlik noois mee begost zien moestik ni zukke brilliante en geniale kleinzeune 'en - mo over em goak later nog wa schrieven, eerst e bitte over me zelve. Kzien dus boere, 72 joare! Merci docteur! Kzien getrouwd gewist, mo me wuf is dood, God et eur ziel. Ze was een schoon meistje en wen vele leute g'et tesoamen. Wen tesamen gelakken en tesamen gebleit: merci Mariette! Ken eur ook vele zittn ploagen, lik ze dee gèren onkrut ut. Ik zeiden altied, das gen avance, da groei toch wère. Je moet da loaten groeien é, God den heere et da gewild. Mo zie wou e schone weide en é. Ken ton dikwijls gezeit, ge doe jen eigen ut, nondedomme! Soms was ze lik onkrut, mo ja da was mo vo te lakken wi. Mien voadere zei altieden: "We muggen toch ki lakken é?"... Mo ja zet toen een hart oanval gekregen. Ken nog zère meneer pastoor gebeld. En zis eigentlik vreedig gestorven - ze was 68.

Kzien nu dikwijls eenzoam, vroeger kwam me kleinzeune nog ki langs, mo nu is da serieus verminderd - azo goat dat in't leven é. Oede menschen worden beschouwd as last. Tis erg, mo tis verdomme azo. Mo kzien ni chagrijnig wi, kdoent nu ip't gemakken. Kieken e bittje TV, klezen me gazette en kmelken me koe beesten. De natuur ku soms schone zien en je krieg vele were van die beesten wi - ken doar al veel liefde van g'et, je kut da ni geloven. Kzien ook geweldig fan van traktors! En da's feitelik de reden van dien blog iere. Kwiln de wereld er attend ip moaken dat er zakken prachtige traktors bestoan, der zien der zodoanig vele. Niemand kut et bie-oeden. Nu, ik wiln ni stoefen, mo ergenst ziek boere en dus e bikke expert. Ik zoen via dit medium de wereld willn loaten meegenieten van de pracht en de praal der traktoren! Kgoan die blog ier zo veel mugelijk trachten up te daten, wellicht weekelijks een nieuwe traktor. Mo nu ek genoeg getypt, kgoan ki me koeien goan checken, want ze zien an't loeien!

Boer Berten - toet de noaste ki!